Maanaj jïh noeri åtnoe pornoste
Maahta pornom jallh pornografijem defineeredh goh vuesiehtimmie seksualiteeteste guvviej, teeksti jïh filmi tjïrrh dejnie aajkojne dah gïeh dejtie vuartasjieh, edtjieh kleenghkes sjïdtedh.
Bijjelen bielie maanijste jïh noerijste gaskem 13 jïh 18 jaepieh leah pornom needtesne vuajneme. Låhkoe læssene aaltarinie jïh lea stööremes baerniej gaskem. Seamma tïjjen goerehtimmieh vuesiehtieh, mejtie Medijavaaksjome lea dorjeme, ahkedh jienebh nïejth aaj pornom vuartasjieh. 55 % dejstie mah pornom needtesne vuartasjamme eah lin 13 jaepieh illeme gosse pornom vuartasjin voestes aejkien. Men mannasinie mijjen dan stoerre ïedtje noerijste jïh pornoste?
Jalhts sïejhme noerh pornom vuartasjieh, maahta dåeriesmoerine sjïdtedh naakenidie. Muvhth maehtieh dan jïjnjem pornom vuartasjidh guktie eah hïnnh jeatjah vihkeles jielededarjomh darjodh. Baahtseme pornose jïh pornon sisvege leah jïjtjemse evtiedamme don teknologeles evtiedimmien mietie. Gaskeviermie jïh digitaale våaromh leah doh sijjieh gusnie stööremes baahtseme pornografeles sisvegasse, mij akte stoerre bielie sjædta veartenevijries valkesistie gaskeviermesne.
Dåeriesmoerh mah leah vïedteldihkie pornose
Gellie digkiedimmieh åtnoen jïh produksjovnen bïjre pornoste mah leah vihkele. Vuesiehtimmien gaavhtan jeenjesh maehtieh jearohke sjïdtedh pornoste jïh porno maahta åssjaldahkh jïh vuajnoeh baajnehtidh mah leah vïedteldihkie sexese, seksuaaleguejmide jïh tjoeleråållide.
Pornosne, maam jeenjemes almetjh vuartasjieh, lea joekoen jïjnje aggresjovne, noerhkeme jïh dominanse, aaj stoerre aalterejoekehts seksuaaleguejmiej gaskem jïh inceste. Prååsehke dåehkieh leah aaj vaahresne pornoindustrijen jïjtsh nåhtoen gaavhtan åtnasovvedh. Dokumenteereme filmh maanijste pornomaterijelleste gååvnesieh needtesæjrojne mah pornografijem faalehtieh, aaj needtesijjieh gusnie jeenjemes almetjh leah guessieh. Rïektesisnie daate lea daaresjimmiedokumentasjovne maanaj jïh noeri vööste. Aaj lïhke ektiedimmieh pornon, prostitusjovnen jïh almetjeåesiestimmien gaskem.
Tjetskehke sexese jïh pornose
Gellie noerh leah tjetskehke sexese jïh pornom nuhtjieh goh akte jieniebidie daajroegaaltijijstie seksualiteeten jïh seksuelle dahkoej bïjre. Pornom vuartasjidh lea jeenjesidie bieline sjïdteme dehtie seksuelle evtiedimmeste.
Mahte 90 % baernijste jïh mahte 40 % nïejtijste leah pornom vuartasjamme åvtelen 18 jaepien båeries. Doh ellen jeenjemes pornom vuartasjieh dan åvteste sijhtieh. Doh jeenjemes buektiehtieh pornografijen jïh rïektesvoeten gaskem joekehtidh, men naakenidie maahta vielie krievije årrodh. Åtnoe pornoste maahta gaskem jeatjah naakenem baajnehtidh mah vuajnoeh jïh vuartoeh satne sexese åtna.
Jearohke pornoste
Muvhth noerh leah vaahresne aktem såarhts jearohkevoetem pornoste evtiedidh mij maahta dam iemie seksuelle evtiedimmiem baajnehtidh. Gosse toleraansem «kruepies pornose» evtede dellie sååjhtoe satne ahkedh vielie ekstreme stimulijem jïjtse seksuelle kleenghkesvoetese daarpesje.
Naakenh maehtieh nåakebe maehtelesvoetem åadtjodh jïjtse jïh mubpiej domtesh guarkedh jïh toelhkestidh jis jearohke sjidtieh pornoste. Dotkeme aaj vuesiehtamme naakenidie dle vaahra seksuelle aggresjovneste maahta læssanidh gosse vædtsoeh pornom vuartasjieh, viertiestamme dejgujmie gïeh eah vædtsoeh pornom vuartesjh.
Nuerebe maanah jïh porno
Nuerebe maanah maehtieh pornografijeste bïllijidh, jïh sååjhtoe dah viehkiem daarpesjieh guarkedh jïh gïetedidh dam maam vuajneme. Vihkele geerve almetjh vååksjedieh guktie maanah gaskeviermiem nuhtjieh jïh maaje pornom ektievoetine gaskeviermesne geerestieh mejtie doh nööremes maanah nuhtjieh. Noeride lea dagke vihkielåbpoe mijjieh hoksebe dah maehtieh hijven seksuelle daajroem jeatjah sijjine åadtjodh. Vihkele porno ij åejviegaaltijinie sjïdth bïevnesidie seksuelle dåemiedimmien bïjre, jïh geerve almetjh tjuerieh noerigujmie soptsestidh pornon bïjre. Dejstie noerijste mah pornom vuartasjieh doh jeenjemes lin nuerebe goh 13 jaepien båeries gosse pornom vuartasjin voestes aejkien.
Noeride lea dagke vihkielåbpoe mijjieh hoksebe dah maehtieh hijven seksuelle daajroem åadtjodh jeatjah sijjine. Vihkele porno ij åejviegaaltijinie sjïdth bïevnesidie seksuelle dåemiedimmien bïjre, jïh geerve almetjh tjuerieh noerigujmie pornon bïjre soptsestidh. Dejstie noerijste mah pornom vuartasjieh doh jeenjemes lin nuerebe goh 13 jaepien båeries gosse pornom vuartasjin voestes aejkien.
Porno faatoes daajroem vadta
Muvhth noerh pornom dååjroeh goh mij akt hijven. Porno lea gaaltije niktemasse, kraanskoemasse jïh slaajperdæmman. Hævvi ij daate daarpesjh vaarege jallh skaaroehtihks årrodh.
Seamma tïjjen daejrebe gellie noerh nåake baajnehtimmiem pornoste åadtjoeh, mij vååjnesasse båata Redd Barnan reektehtsisnie «Et skada bilde av hvordan sex er» jaepeste 2020. Guktie sexem pornosne vuesehte maahta meatan årrodh båajhtoeh guvviem noeride vedtedh guktie sexe sïejhmemes lea. Pornosne vaenie fokuse domtesidie almetji gaskem mah sexem utnieh. Åejviefokuse lea seksuelle dahkoej vööste. Porno lea aktelaaketje gosse måjhtele mij seksuelle relasjovne jïh seksuelle dååjresh maehtieh årrodh.
Vuartoeh
Maanah jïh noerh soptsestieh sex pornosne ov-realisteles vuartoeh seksuelle dahkojde, relasjovnide jïh dååjresidie vedtieh. Porno maahta vuartoeh baajnehtidh maam jïjtsasse åtna, jïh ovseekerevoetem vedtedh kråahpen jïh guelmien bïjre, seksuelle dahkoeh, seksuelle domtesh, kleenghkesvoete, prestasjovne jïh gaarsje.
Sex pornosne aaj maahta båajhtoeh guvviem jïh ovrealisteles vuartoeh vedtedh akten mïelehkasse jallh almetjasse mejnie edtja sexem utnedh. Porno maahta aaj baajnehtidh maam noere veanhta seksualeguejmie satneste veanhtede. Varke heannede naakenh meatan sjidtieh mesnie akt maam ij sïjhth darjodh, men meatan sjædta dan åvteste veanhta daate lea iemie jïh dïhte mubpie dam veanhtede.
Dorjehtimmien jïh rïektesvoeten gaskem joekehtidh
Maanide jïh noeride maahta geerve årrodh dorjehtimmien jïh rïektesvoeten gaskem joekehtidh. Aelhkie mistelaakan guarkedh mij öörnegisnie jïh ij öörnegisnie. Pornon sisnjelen lea sïejhme sex geerve almetji gaskem dovne såemies fysiske jïh psykiske aggresjovnem meatan åtna.
Goerehtimmieh vuesiehtieh dan jïjnje goh 1 ållesth 3 scenijstie veedtjesovveme lyjhkedihks pornoneedtesijjijste, sexem jååhkesjimmien namhtah vuesehte. Akte dejstie guejmijste lea daamtaj dïhte mij muana (dominaante) jïh dam mubpiem narrehte. Sex pornosne lea åajvahkommes ålman orgasmen bïjre. Noerh reektieh ij leah aelhkie pornom gaavnedh mij «sïejhme sexem» vuesehte.
Daajroe jearsoe geerve almetjijstie
Vihkele maanah jïh noerh sexen jïh seksualiteeten bïjre lierieh jearsoe geerve almetjijstie. Jis maanah jïh noerh eah daajroem teeman bïjre åadtjoeh geerve almetjijstie mejtie leajhtadieh, noerh sijhtieh daajroem veedtjedh jeatjah sijjijste, aaj pornoste. Jearsoe geerve almetjh amma dïedtem utnieh maanah jïh noerh daajroem sexen – jïh pornon bïjre – dejstie reaktoe almetjijstie åadtjoeh.
